— Наша гісторыя —
Мара была вымушана пачакаць
Прывітанне, мы Сяргей і Наташа — пара беларусаў, якая цяпер жыве ў Польшчы.
Вярнуцца ў Беларусь мы не можам праз палітычны пераслед. Сяргей — былы палітычны зняволены, а супраць Наташы распачатая крымінальная справа.
Калісьці ў нас былі планы і мары — у тым ліку стварыць сваю экавёску, месца, дзе можна адпачыць ад гарадскога шуму і мітусні.
Пасля эміграцыі гэтую мару давялося адкласці. Але ў лютым 2026 года мы знайшлі стары хутар на Падляшшы і адразу зразумелі: гэта тое самае месца.
Цяпер крок за крокам мы вяртаем яго да жыцця і ствараем тут Мрою.
— Што такое Мроя —
Беларусь, у якую можна прыехаць
Мроя — выключнае беларускае слова. Гэта мара, якой наканавана спраўдзіцца. Не фантазія, якая так і застанецца фантазіяй, а мара, якая паступова становіцца рэальнасцю.
Мы аднаўляем стары хутар і ствараем месца, куды можна прыехаць, адпачыць ад горада, пажыць сярод лесу і адчуць сябе часткай Мроі.
Гэта аднаўленне сябе праз адраджэнне дома, якому калісьці амаль ніхто не даваў шанцаў. Гэта месца, дзе можна выдыхнуць, запаволіцца і хаця б ненадоўга адчуць сябе як у дзяцінстве.
— Легенда хутара —
Падчас пажару дом цалкам згарэў
Нам ужо пішуць людзі, якія калісьці жылі тут або звязаныя з гэтым месцам. Так мы даведаліся, што тут было два хутары, дзе жылі сем’і двух братоў.
Аднойчы ў дом аднаго з братоў ударыла маланка. На шчасце, ніхто не пацярпеў, але дом цалкам згарэў. Тады мясцовыя жыхары сабраліся талакой і хутка пабудавалі новы дом.
Наша мара — вярнуць гэтаму хутару жыццё і стварыць тут месца, у якое сапраўды хочацца вяртацца.
— Абжываем Мрою —
З намёта ў маленькі домік
Першыя тры месяцы мы прыязджалі на хутар на выходныя і начавалі ў намёце, які паставілі проста ўнутры старога дома.
Але, вядома, каб праводзіць тут больш часу, нам былі патрэбныя зручны ложак і хаця б мінімальна камфортныя ўмовы для жыцця.
Так у Мроі з’явіўся наш першы маленькі домік, які спраектаваў Сяргей, а пазней — лазня.
За лета мы таксама зрабілі тэрасу, прыбіральню і іншыя простыя рэчы, без якіх жыццё на хутары было б значна складанейшым.
А яшчэ Сяргей пабудаваў тры выставачныя ўзоры гасцявых домікаў.
І мы робім усё магчымае, каб да наступнага сезона пабудаваць 10 паўнавартасных гасцявых домікаў і афіцыйна адкрыць агратурыстыку.
Хочаце такі домік ці лазню для свайго ўчастка?
Кожны выставачны домік і лазню, якія стаяць у Мроі, можна купіць або замовіць такую ж мадэль для свайго ўчастка. Можна выбраць прыдатную мадэль і камплектацыю, а пры неабходнасці Сяргей возьме на сябе зборку і мантаж.
— Прыехаць у Мрою —
Як прыехаць у Мрою
Хочаце даведацца, як гэта — жыць у адным з нашых гасцявых домікаў, схадзіць у лазню і ўбачыць Мрою на свае вочы? Напішыце нам — мы абмяркуем магчымасць прыезду, дамовімся пра дату і дэталі.
Падтрымаць агонь Мроі
Мы не ведаем, як хутка атрымаецца зрабіць усё, што задумана. Кожны новы домік, кожная пабудова і кожны наступны крок патрабуюць часу, працы і вялікіх укладанняў. Але хутар ужо жыве. І калі вам блізкая наша Мроя, стаць часткай яе гісторыі можна ўжо цяпер.
Месца для тых, каму асабліва патрэбная перазагрузка
У будучыні на нашым хутары мы плануем вылучыць два гасцявыя домікі для былых палітвязняў, вайскоўцаў і іншых людзей з уразлівых груп.
Пражыванне ў гэтых доміках будзе бясплатным — каб чалавек мог прыехаць сюды на некалькі дзён, адключыцца ад паўсядзённай мітусні, пабыць у лесе, пераключыцца і аднавіць сілы.
Калі вам ці вашаму блізкаму патрэбная такая магчымасць, напішыце нам. Кожны такі прыезд мы будзем узгадняць індывідуальна.